المطوع لو يشوف خديد ساره

هيّض ابن فهاد في تالي نهاره ألف قافٍ من ضميره مدرجاتي
يا وجودي وجد مكسور الجباره ساهرٍ تسعين ليله ما يباتي
أو وجود اللي فضى الحاكم دياره وخذ ماله و الحريم مسلّباتي
عقب ماهو تاجرٍ راعي امـاره صار فلاحٍ أموره هيّناتي
كن في عينه من الفرقا شراره أو مخاليب الوحوش الطايراتي
ارتحل ياحمود منبوز الفقاره آركي وحبال كوره كالفاتي
آركي و مربعٍ عشب القراره ما علاه الشد من عشر سنواتي
ديرة ابن دعيج ما فيها صقاره غير شيبانٍ و عجز محندباتي
من خشوم كميت ليا حد الزباره جعل تمحل و الوشوم مربعاتي

صاحبي بالوقف مدهاله و داره ما سكن في ثرمدا و الا مراتي
ولعتني بالهوى و الحب ساره دلّهتني عن غنادير البناتي
يا حسايف بنت بن سلوّم ساره عند أبوها تدّرج مثل المهاتي
ريق ساره مثل سكر في غضاره أو حليب ابكار عربٍ مسمناتـي
و النهيد زبيديٍ في دعب قاره في محير الما القراح مصلّعاتي
و الثنايا قحويانٍ في زباره زاهيٍ نبته على كل النباتي
راس ساره ذيل شقراً وسط غاره و الجدايل بالرشوش مجدّلاتي

المطوع لو يشوف خديد ساره طبّق المصحف و عجّل بالصلاتي
ما ذكر جارٍ ذبح بالحب جاره بالمبيسم و الثنايا المرهفاتي
حالفٍ ما انسى ولا اسلى حب ساره كود أهل شقرا يخلون الصلاتي
لايمي يعطى حنيشٍ في خباره سمها يشظى العظام الصالباتي

للشاعر: محمد بن فهاد القحطاني

من اليوتيوب