أنتم تشوفونا بضيم وساكتين

أنتم تشوفونا بضيم وساكتين * واسكت وأنا أسكت لاش علم ولا خبر

هذي سنة واصبر علينا وسنتين * واصبر علينا يوم وأسبوع وشهر

إليا نخيناكم ترونا ضايقين * والله فلا جيناك باليوم العفر

ماعاد باقي عندنا غير اليقين * وسلوم أهلنا والكرامة والشعر

وأما الصبر وأحلامنا راحن طحين * صبر محرم سارجينه من صفر

راحن على كذب المنافق والذهين * اللي فعل وإللي ترك وإللي دمر

إللي ليا جيته بسط لك باليمين * شمس الضحى وبكف يسراك القمر

عدك على هداج ولا الرافدين * وإن صملت عدك على عج الحفر

واليوم لو يصعب علي بوح الكنين * يحدنا للمر شيٍ منه .. أمر

وأخيرك يا طير شلوى حاجتين * أما السنع ولا تسلفنا صبر

صابتني التخمة من العذر السمين * ماعاد في جوفي مكانٍ للعذر

صرنا من أحداث الليالي ملكعين * ولا أول أجواد نجامل ونعذر

شرهين لكن نقتنع في كلمتين * ونصدق إن القدر يبقى بالصدر

القدر والله وقف رجل وشوف عين * وفعل يحط الليلة الظلما ظهر

الله يعين ايه أدري إن الله يعين * والله لا يتكلنا على زيد وعمر

حنا على رب البشر متوكلين * والسعي فرض الله على كل البشر

ونورد الشرهات صوب الغانمين * إللي سمعنا عن علومه ونخبر

خطو ابلجن قد جربوه الطيبين * لا مرة ولا مرتين ولا عشر

وإليا تبين موقفٍ قاسي يبين * وياخذ شهاده حسن تدبير وشكر

نجي على الهقوات صوب الشامخين * إللي يعرفون الشموخ من الكبر

من الحيا والمرجله متجملين * ونفوسهم وبيوتهم ماهي قفر

يمبيك عن وصف السنافي شارتين * عقب نباه إللي مثل قطف الزهر

لو راحت التندى يبي يندى الجبين *عن قولة عن واجب العاني قصر

آخذ على نفسي قبل وصله يمين * قدره يزود ولا ينقص لي قدر

للشاعر / نجم الأسلمي